الأخبار
2026-cı il Nobel mükafatı laureatları açıqlanıb
2026-cı il Nobel mükafatı laureatlarının adları oktyabrın 5-dən 12-dək elan edilib. Müxtəlif sahələrdə elmi kəşfləri, ədəbi yaradıcılığı, sülhün qorunmasına və iqtisadiyyatın inkişafına töhfələri ilə seçilən şəxslər nüfuzlu mükafatlara layiq görülüblər. Laureatların adları Nobel mükafatının rəsmi internet səhifəsində dərc olunub.
Tibb və fiziologiya üzrə Nobel mükafatı Karl Deisseroth, Peter Hegemann və Georg Nagelə təqdim olunacaq. Onlar işıq vasitəsilə sinir hüceyrələrinin fəaliyyətini idarə etməyə imkan verən optogenetika sahəsindəki kəşflərinə görə təltif ediliblər.
Fizika üzrə Nobel mükafatına Francis Halzen layiq görülüb. Alim kainatdan gələn yüksək enerjili neytrinoların aşkarlanmasına və bu sahədə elmi tədqiqatların inkişafına verdiyi töhfələrə görə mükafatlandırılıb.
Kimya üzrə Nobel mükafatı Henri B. Kagan və Kenso Soaiyə verilib. Onların tədqiqatları kimyəvi reaksiyalar zamanı molekulların güzgü əksi formalarının seçici şəkildə əldə edilməsi ilə bağlıdır. Bu istiqamətdəki araşdırmaların dərman preparatlarının hazırlanması baxımından da əhəmiyyəti var.
Ədəbiyyat üzrə Nobel mükafatının laureatı kanadalı yazıçı Anne Carson olub. O, klassik ədəbi ənənələri müasir yaradıcılıq yanaşmaları ilə birləşdirən əsərlərinə görə mükafatlandırılıb.
2026-cı il Nobel Sülh Mükafatına Navi Pillay layiq görülüb. O, beynəlxalq hüququn və insan hüquqlarının müdafiəsi sahəsində fəaliyyəti ilə tanınır.
İqtisadiyyat üzrə Nobel mükafatı isə Robert E. Hall və Michael Woodforda verilib. Onların makroiqtisadi modelləşdirmə sahəsindəki tədqiqatları iqtisadi dalğalanmaların və iqtisadi siyasətin öyrənilməsinə töhfə verib.
Nobel mükafatlarının təqdimetmə mərasimi 10 dekabr 2026-cı ildə keçiriləcək. Fizika, kimya, tibb və ya fiziologiya, ədəbiyyat və iqtisadiyyat üzrə mükafatlar İsveçin Stokholm şəhərində təqdim ediləcək. Nobel Sülh Mükafatının təqdimetmə mərasimi isə Norveçin Oslo şəhərində baş tutacaq. Tarix Alfred Nobelin vəfatının ildönümünə təsadüf edir.
المعرض
