ALLAHIN TƏNLİYİ!

XX əsrin ortalarından etibarən elmin populyarlaşdırılması geniş vüsət almışdır. XXI əsrdə isə bu proses daha da sürətlənmiş və yüzlərlə tanınmış alim bu istiqamətdə fəaliyyət göstərmişdir. Bu sahədə Nobel mükafatı laureatlarının rolu xüsusilə böyükdür.

Elmin populyarlaşdırılmasında Michio Kakunun xüsusi xidmətləri vardır. Onun “Fizikanın gələcəyi”, “Zəkanın gələcəyi” kimi kitabları geniş oxucu kütləsi tərəfindən maraqla qarşılanmışdır.

Alimin “Allahın tənliyi” əsəri isə kainatın yaranması, inkişafı və insanın bu sistemdəki yeri haqqında fundamental fiziki nəzəriyyələrin izahına həsr olunmuşdur. Müəllif bu kitabda Isaac Newtonun mexanika sahəsindəki inqilabi kəşflərini, Michael Faraday və James Clerk Maxwell tərəfindən formalaşdırılmış elektromaqnetizm nəzəriyyəsini, Albert Einsteinin nisbilik nəzəriyyəsini və kvant mexanikasının əsas prinsiplərini təhlil edərək bütöv fiziki mənzərəni izah edir.

Artıq yarım əsrdən çoxdur ki, dünyanın müxtəlif ölkələrində fiziklər bütün fundamental qarşılıqlı təsirləri birləşdirən vahid nəzəriyyə yaratmağa çalışırlar. “Tunelin sonunda işıq varmı?” sualına cavab axtaran bu kitab oxucunu elmi düşüncənin dərinliklərinə aparır.