SCIENCE IS BEAUTIFUL
Süni intellekt texnologiyalarının 2026-cı ildə əmək bazarında ciddi dəyişikliklərə səbəb olacağı gözlənilir. Nobel mükafatı laureatı və süni intellekt sahəsinin tanınmış alimlərindən biri olan Ceffri Hinton CNN-ə müsahibəsində bu texnologiyaların bir sıra peşələri yaxın illərdə əvəz edə biləcəyini bildirib.
Alimin fikrincə, ilk növbədə çağrı mərkəzləri, texniki dəstək xidmətləri və standart ofis tapşırıqları avtomatlaşdırılacaq. O qeyd edir ki, süni intellekt modellərinin imkanları təxminən hər yeddi aydan bir ikiqat artır. Bu inkişaf proqramlaşdırma sahəsində də özünü göstərir: əvvəllər saatlarla vaxt tələb edən tapşırıqlar indi dəqiqələr ərzində yerinə yetirilə bilir. Hinton yaxın gələcəkdə mürəkkəb proqram təminatı layihələrinin daha az sayda mütəxəssisin iştirakı ilə hazırlanacağını proqnozlaşdırır.
Ceffri Hinton 2023-cü ildə Google-dan ayrıldıqdan sonra süni intellektin mümkün təhlükələri ilə bağlı narahatlıqlarının artdığını vurğulayıb. Onun sözlərinə görə, bu texnologiyalar yalnız təhlil və nəticəçıxarma qabiliyyətlərini deyil, müəyyən hallarda insanları manipulyasiya etmək imkanlarını da inkişaf etdirir.
Alim süni intellektin tibb və iqlim tədqiqatlarına müsbət təsirini qəbul etsə də, qlobal risklərin azaldılmasına kifayət qədər diqqət yetirilmədiyini düşünür. Şirkətlərin iqtisadi mənfəəti əsas prioritet hesab etməsi təhlükəsizlik məsələlərinin arxa plana keçməsinə səbəb ola bilər.
Hinton hesab edir ki, insan əməyinin süni intellektlə əvəzlənməsi iqtisadi bərabərsizliyi dərinləşdirə, sərvətin daha az sayda insanın əlində cəmləşməsinə və bir çox şəxsin gəlir mənbəyini itirməsinə gətirib çıxara bilər. O xəbərdarlıq edir ki, sosial müdafiə tədbirləri, peşə hazırlığı proqramları və gəlirlərin ədalətli bölgüsü təmin edilməzsə, süni intellektin geniş tətbiqi yeni yoxsulluq dalğası yarada bilər.
