Philippe Aghion

Fransız iqtisadçısı, Collège de France və INSEAD universitetlərinin professorudur. Tədqiqatları innovasiya, rəqabət və iqtisadi artım sahələrini əhatə edir. 2025-ci il İqtisadiyyat üzrə Nobel mükafatını Peter Howitt ilə birlikdə yaradıcı dağıdıcılıq vasitəsilə davamlı iqtisadi artım nəzəriyyəsinə verdiyi töhfələrə görə alıb. Joel Mokyr mükafatın digər yarısını qazanıb. Aghionun fikrincə, iqtisadiyyat yeni ideyalar, texnologiyalar və biznes modelləri vasitəsilə inkişaf edir. Yeni şirkətlər və məhsullar köhnə texnologiyaları əvəz edir. İqtisadiyyatda bu proses “yaradıcı dağıdıcılıq” (creative destruction) adlanır. Məsələn, smartfonların yayılması ənənəvi mobil telefon bazarını dəyişdirdi, yeni biznes sahələri yaratdı və bəzi köhnə məhsulları bazardan çıxardı. Aghionun nəzəriyyəsi bu dəyişikliklərin uzunmüddətli iqtisadi artıma necə töhfə verdiyini izah edir.